"పుష్పా అంటే ఫ్లవర్ అనుకున్నావా ఏంది ? కాదు ఫైర్" అనే డైలాగ్ వల్లే నిప్పు గొప్పతనం మనందరికీ తెలిసివచ్చింది. అదేదో సినిమాలో బ్రహ్మీ చెప్పిన ఫైర్ డైలాగ్ మనం గుర్తు చేసుకుంటే నిప్పును నిప్పుతో ఆర్పలేము అనే ఇంగిత జ్ఞానం కూడా కలుగుతుంది. మనం వంట చేస్తూనో, దీపావళి టపాసులు కాలుస్తూనో నిప్పుతో చెలగాటమాడుతూ ఉంటాము. నీరు, నిప్పు, గాలి, నేల మరియు నింగి అనేవి పంచభూతాలు. వీటిని వాడుకునే తీరు తెలియకుంటే ప్రమాదాలు కోరి తెచ్చకున్నట్టే అంటున్నారు అగ్నిమాపక దళ సిబ్బంది. ఈ రోజు ఏప్రిల్ 17, 2023 న అగ్నిమాపక దళ వారోత్సవాలు మా కళాశాల లో జరిగాయి. అగ్ని ప్రమాదాలు వేసవి లో జరగడం సర్వసాధారణం. అందునా మనవి రాయలసీమ ఎండలు. మరి అగ్నిప్రమాదాలు నివారించడానికి తీసుకోవాల్సిన జాగ్రత్తలు ఈ క్రింద ఇస్తున్నాను. 

- చిన్న పిల్లలకు అగ్గిపెట్టలు, టపాసులు, లైటర్ లు ఇవ్వకండి 

- తగలబడే అవకాశమున్న పదార్థాల ను ఇంటిలో ఉంచుకోకండి 

- గాలి, వెలుతురు వచ్చేలా ఇంట్లో ఏర్పాటు చేసుకోండి 

- నాణ్యమైన సిలిండర్ ట్యూబును వాడండి. బొక్కలు పడిన ట్యూబు వాడి జీవితానికి బొక్కెట్టు 

   కోకండి 

- రెగ్యులేటర్ వాల్వ్ ను ఆఫ్ చేయడం మరవకండి. 

- వేడి నూనె మీద నీళ్ళు చిలకరించకండి 

- అగ్ని ప్రమాద సమయం లో లిఫ్ట్ ఉపయోగించకండి 

- విద్యుత్ తీగలకు, పరికరాలకు నిప్పంటుకుంటే, నీళ్ళు పోయకండ్రా అయ్యా!

- ఎక్కువ రోజులు ఇల్లు వదిలి ఉండవలసి వస్తే, ఎలెక్ట్రిక్ మెయిన్ స్విచ్ ఆఫ్ చేయండి. 

- గడ్డి వాములను ఇళ్లకు దూరంగా పెట్టుకోండి 

- విద్యుత్ తీగలకు దగ్గరగా గడ్డి వాములను పెట్టకండి 

- ప్రమాద నివారణకు తగినంత నీటిని నిల్వ పెట్టుకోండి 

- వెల్డింగ్ పనులకు  నిపుణులను ఉపయోగించండి. ఏదో skill development course లు చదివేసాము     కదా అని మీరు వెల్డింగ్ పనులకు పూనుకోకండి.  

- దీపావళికి టపాసులు కాల్చుకోండి అంతే గానీ చేతులు, మూతులు కాల్చుకోకండి. 

- క్యాంపస్ లో చెత్తా చెదారం పోగు పడకుండా చూడండి. 

పై సంగతులన్నీ మంచి సెన్స్ ఆఫ్ హ్యూమర్ తో సబ్ ఇన్స్పెక్టర్ నజీర్ గారు తెలియజేశారు. ఈ కార్యక్రమం మొత్తం వైస్ ప్రిన్సిపల్ డాక్టర్ వెంకట శేషయ్య మరియు NSS Officer డాక్టర్ పి. ఎల్. కాంతారావ్ ఆద్వర్యం లో జరిగింది. ఇలాంటి కార్యక్రమాలు జరగడం వలన చేతులు కాలిన తరువాత ఆకులు పట్టుకునే అగత్యం తప్పుతుంది. 

                                                                        - G L N PRASAD

గెలిచినవాడికి కాలం చెయ్యెత్తి జై కొడుతుంది.. ఓడిన వాడికి కాలం జల సమాధి కడుతుంది అన్నారు సినారె. ఇది అక్షరాలా నిజం. గెలుపు ఇచ్చే ఆనందం ఇంకా ఏదీ ఇవ్వదు. గెలిస్తే జై కొడతారు, ఓడితే ఛీ కొడతారు. జై కొట్టించుకోవడమా, ఛీ కొట్టించుకోవడమా  అనేది మన చేతుల్లోనే ఉంది. నిరంతరం శ్రమిస్తే గెలపు నీకు సలాం చేస్తుంది అనే విషయాన్ని విద్యార్థులకు అవగాహన కు తీసుకురావాలనే ఉద్దేశ్యంతో ఈనాడు 'ఈనాడు' దినపత్రిక వారి నిర్వహణ లో టాలెంట్ టెస్ట్ ను మా విద్యార్థులకు నిర్వహించాము.160 మంది పాల్గొన్న ఈ పోటీ లో జాహ్నవి, వెంకటేశులు మరియు సంతోష్ అనే విద్యార్థులు ప్రథమ, ద్వితీయ మరియు తృతీయ స్థానాలలో నిలిచారు. వీరికి ఈనాడు పత్రిక వారు మంచి విలువైన బహుమతులను అందజేశారు. మేము విద్యార్థులకు ప్రతి మలుపు లో గెలుపును పరిచయం చేస్తాము. గెలవడం మనకు ఒక అలవాటు కావాలి. 

విద్యార్థు లారా! గెలుపును బానిసగా మార్చుకోవాలనుకునే వారికోసం ఈ గీతం 

'ఉడుకు పుట్టాలి 

                                                                      ఊపు రావాలి ,

                                                            మట్టిలో పుట్టి మణివి కావాలి, 

                                                                నీదొక ఆగని ప్రయాణం, 

                                                            అడుగు దాటును యోజనం' 

      మీ గెలుపుకు మా భరోసా అనేది ఈ కల్యాణదుర్గం ప్రభుత్వ డిగ్రీ కళాశాల చేస్తున్న వాగ్దానం. అన్నట్టు చెప్పడం మరిచాను. ఈ మొత్తం తతంగం వెనుక ఉన్న సూత్రధారి, పాత్రధారి మనందరి కాంతారావే.  

ఈ రోజు కల్యాణదుర్గం కళాశాల మహదానంద వేదిక గా మారిపోయింది. పెడ దోవ పడుతున్న యువతను, కోరికల గుర్రాల నెక్కి కదం తొక్కుతున్న యువతను మంచి దోవలో పెట్టి, యవ్వన దశలో ఆరోగ్య స్పృహ ఎలా కలిగి వుండాలో తెలియజేసే కార్యక్రమం ఈ రోజు జరిగింది. స్త్రీ సాధికారత కమిటీ మరియు జంతుశాస్త్ర విభాగాలు సంయుక్తంగా చేపట్టిన ఈ సదస్సులో వైద్యులు హేమలత మరియు రూప పాల్గొని చిన్నా, పెద్దా అందరికీ ఆరోగ్య స్పృహ కల్పించారు. భౌతిక, మానసిక, పర్యావరణ, వృత్తిపర ఆరోగ్యాల గురించి బిషగ్వరులు చక్కగా తెలియజేశారు. యువత పదుగురు 'మెచ్చే పండు' లా  ఉండాలని.. 'పుచ్చు పండు'లా ఉండకూడదని ఛలోక్తులతో, చతురో క్తులతో చక్కగా తెలియజేశారు. చరవాణుల చెర లో బందీలు గా మారిపోకండని చెప్పారు. ఈ మాట మా అధ్యాపకుల మనసులలో సైతం నాటు నాటు పాటలా నాటుకుపోయింది. చరవాణులను మీటి.. మీటి వేళ్ళు రోళ్ళ లాగా మారిపోయి చాలా మంది యువత ఈ వైద్యుల వద్దకు వస్తున్నారట. ( ఈ మాట వాళ్ళు చెప్పేటప్పుడు, నా వేలు ఎవరికీ కనపడకుండా దాచి పెట్టుకున్నాను). నేను కూడా ఇంస్టాగ్రామ్ వీడియో లు రోజుకో వంద వరకు చూస్తాను లెండి. కళ్ళు కూడా దెబ్బ తింటాయట. యువత ఎంత దృశ్య భ్రాంతికి లోనవుతోందో కదా!!! పులి మీద పుట్ర లాగా ఇప్పుడు అదేదో కృత్రిమ మేధ రాబోతుందట. ఇక యువత కళ్ళూ, కాళ్ళను చెకుముకి రాళ్ళు గా చేసుకుని మనసుకు  మంట పెట్టేసుకోవడం ఖాయం. మరి ఇంత ఇంద్రియ చపలత్వం ఉన్న మన బుడ్డోళ్ల ని మంచి మార్గం లో పెట్టాలంటే వారికి అంతో.. ఇంతో.. ఏ కొంతో ఆరోగ్య స్పృహను కలుగజేయాలి. కాబట్టి యువతా !నీ భవిత చరవాణి రూపంలో నీ చేతిలోనే ఉంది. అది రెండు వైపులా పదునున్న వాడి కత్తి. జాగ్రత్త గా వాడుకో. ఆన్లైన్ పాటాలు వినడానికి మాత్రమే ఉపయోగించు అని చెప్పేశారు. ఇంకో మాట కూడా ఈ వైద్యులు చెప్పారు. OTT ద్వారా నీ నట్టింట్లోకి వచ్చే నానా చెత్తా చూసేయకురా అబ్బాయ్ అని కూడా చెప్పారు. బయటి ప్రేమ లకు లొంగకండి అని కూడా చెప్పారు. చూడడానికి బాగా కనపడడం ఆరోగ్యం కాదట. శారీరిక, మానసిక, భావోద్వేగ పరంగా బాగుంటేనే ఆరోగ్యమట. డాక్టర్ లు హేమలత మరియు రూప మా విద్యార్థులకు చేసిన సూచన లను ఈ క్రింద ఇస్తున్నాను 

- చరవాణులు అవసరానికి మించి వాడకండి 

- ఆరోగ్య కరమైన ఆహారాన్ని తీసుకోండి. 

- ఇంటి వంట తినండి. 

-చిరు తిండ్లు మానండి 

- శారీరిక వ్యాయామం చేయండి 

- నడక, నడత ఈ రెండూ ముఖ్యమే ఎవరికైనా 

- ఇంటి వారితో ఆరోగ్యకరమైన అనుబంధాన్ని కలిగి ఉండండి ( ఇదేదో మాకు వర్తించేలా ఉంది) 

- ఏకాగ్రత ను సాధన చేయండి  

- కొద్దిగా ధ్యానం చేయండి 

- ఉదయాన్నే లేవండి 

- చెడు అలవాట్లు కలిగిన వారితో తిరిగితే పెగ్గులు.. హగ్గులు అలవాటవుతాయి. అదేదో Peer Pressure అంటారట దాన్ని.  

- ధూమ పానం, మద్యపానం, మాదక ద్రవ్యాలకు దూరంగా ఉండండి  

 వాళ్ళు చెపుతుంటే, మా పిల్లలు ఎంత చక్కగా విన్నారని. నడత నేర్పే ఇలాంటి కార్యక్రమాలు అడపా దడపా జరపడం మా ప్రిన్సిపల్ జయరామ రెడ్డి కి మాత్రమే సాధ్యం. 

కొసమెరుపు ఏమంటే వచ్చే వారం మా విద్యార్థులకు CPR లో శిక్షణ ఇస్తామని వాగ్దానం చేసి వెళ్లారు డాక్టర్ హేమలత గారు. 

అందరికీ ధన్య వాదాలు 

ఇంకో కార్యక్రమం ఊసులు మరోసారి పంచుకుందాం. 

                                                                                                   - G L N Prasad